Xərci olmayan faydalı reseptlər

qabıqlar

Keçmişdə ev xanımlarının bir boxçası olardı, orda müxtəlif meyvə, yarpaq, kök qurularından ibarət bir ev apteki olardı, indi belə apteklər rayonlarımızda, kəndlərimizdə hələ də var. Bu cür müalicənin heç bir ziyanlı tərəfi olmur və olduqca ucuz qiymətə başa gəlir. Boxçanızı zənginləşdirmək üçün bir neçə faydalı reseptlər təklif edirəm:

Alma ilə resept

Alma yeyən zaman qabıqlarını atmayın, ən keyfiyyətli sirkə alma qabığından alınandır. Almanı yeyən zaman tumu ilə birlikdə yeyin, alma tumu yodla və xərçəng əleyhinə təsir göstərən maddələrlə zəngindir.

Şaftalı ilə resept

Şaftalı yarpağı görən zaman toplayıb kölgədə qurudun, bunu bərabər miqdarda gavalı yarpağı qurusu ilə qarışdırıb, dəmləyib yeməkdən əvvəl içə bilərsiniz, öd durğunluğunda faydalıdır.

Gilas ilə resept

Cır vişnə (buna gilənar də deyirlər) ağacını görəndə ağacın uc hissəsindəki zoğlarından yığıb qurudun, qışda soyuqdəymə əleyhinə ən təsirli və tərlədici vasitədir. Gilasdan mürəbbə bişirən zaman saplaqlarını atmayın, gilas saplağı yaxşı sidikqovucu kimi həm böyrəkləri və sidik yollarını iltihabdan təmizləyir, həm də insanı arıqladır, bunun üçün saplaqları sadəcə dəmləyib içmək lazımdır. Xatırladım ki, cır gilasın tumlarını yığıb əzib toz formasına salın, şəkər xəstələri (2 ci tip şəkər) gündə 3 dəfəyarım çay qaşığı bu tozdan ağıza atıb üstdən 1 stəkan su içməlidirlər, çox əla bir şəkər salıcıdır. Xərçəng xəstələri isə antioksidant mənbəyi olaraq yuxarıda yazdığım formada qəbul edə bilərlər.

Heyva ilə resept

Heyva yarpağı dəmləməsi də soyuqdəymələrdə və öskürəkdə faydalıdır, heyva yarpağının dəmləməsi uşaqlıq kistalarının əridilməsi üçün də çox faydalıdır beləki qurudulmuş heyva yarpaqları doğranılır, 2 xörək qaşığı 3 stəkan suda dəmlənilir, gündə 3 dəfə yeməkdən 1 saat əvvəl 1 stəkan içilir, müalicə müddəti 1 ay, müalicəni davam etdirmək istəsəniz 15 gün fasilə verib yenə davam edə bilərsiniz.  bunun üçün heyvanın tumlarından da istifadə edə bilərsiniz, belə ki, heyva yeyən zaman tumlar çıxarılıb qurudulur və südlə dəmlənib içilir. Yarım çay qaşığı heyva tumunu bir stəkan soyuq suya atın, bir gün gözləyin, mədə yarası, qastrit və öskürəklərdə yeməkdən əvvəl için.

Söyüd yarpağı ilə resept

Söyüd yarpağı qurusu revmatizm zamanı dəmləmə formasında içilir. Söyüd yarpaqlarının dəmləməsi qanı duruldur, iltihab əleyhinə təsiri vardır, revmatizmlərdə qurudulmuş yarpaqlarından və ya cavan budaqların qurudulmuş qabıqlarından 2 orta xörək qaşığı götürüb 3 stəkan suda dəmləyib gündə 3 dəfə yeməkdən 2 saat sonra 1 stəkan içmək lazımdır.

Çiyələk mürəbbəsi bişirəndə saplaqları atmayın, kölgədə qurudun, qaraciyər xəstəliklərində və öd mənşəli köpmələrdə dəmləyib için.

Şabalıd ilə resept

Şabalıd meyvəsi qabıqlarının dəmləməsi böyrək daşlarını tökür və prostatit əleyhinə təsir edir. Çox güclü bir qandurulducudur.  Bunun üçün 2 xörək qaşığı kiçik-kiçik doğranılmış qabıqlarından  3 stəkan suda dəmlənib gündə 3 dəfə yeməkdən əvvəl 1 stəkan içilməlidir.

Qoz-fındıq ilə resept

Fındıq yarpağı dəmləməsi pozulmuş qan dövranını bərpa edir. Əgər sizin əlləriniz və ayaqlarınız həmişə soyuq olursa bu dəmləməyə bal əlavə edin, gündə 3 dəfə 1 stəkan için. Fındıq yarpağı prostat böyüməsi (hiperplaziyası) üçün də çox faydalıdır.

Qoz yeyən zaman arakəsməsini atmayın, yığıb qəhvəüyüdəndə üyüdün və 200 qramını yarım kiloqram bal ilə qarışdırıb məcun hazırlayın. Bu məcundan gündə 2 dəfə 1 çay qaşığı 1 stəkan suya qarışdırıb için. Məcun yod çatışmazlığını aradan qaldırır, beyin damarlarını açır və beynin qidalanmasını yaxşılaşdırır. Qoz yarpaqlarını dərəndə cavan yarpaqlardan yığıb qurudun, uşaqlarda və böyüklərdə vitamin əskikliyi zamanı dəmləyib, bal əlavə edib için. Qurudulmuş qoz yarpaqlarını qəhvəüyüdəndə toz formasına salın, xına ilə qarışdırın və dəmləyib saçınıza qoyun, bu zaman saçlarınız tünd şabalıdı rəngə boyanacaqdır.

Nar ilə resept

Nar yeyən zaman qabığını atmayın, nar qabığını qurudun və 2 çay qaşığı 1 stəkan suda 5 dəqiqə qaynadıb süzün, sonra bal əlavə edin, belə dəmləmənin ishallar zamanı içilməsi əvəzolunmazdır. Nar qabığının dəmləməsi ilə qarqara edən zaman ağız yaraları sağalır və diş əti bərkiyir.

Əzgil ilə resept

Əzgil saplağının dəmləməsi qanlı ishalı aradan qaldırır.

Zeytun yarpağı ilə resept

Təzyiqiniz və şəkəriniz varsa, hər gün zeytun yarpağı dəmləməsi için.

Soğan ilə resept

Bazarlarda soğan satanlar soğanın qabıqlarını soyub atırlar, əslində isə soğan qabıqları olduqca faydalıdır. İki ovuc soğan qabığı 2 litr süddə  10 dəqiqə vam odda qaynadılır, babasil xəstəliyi zamanı gündə 1 dəfə yarım saat bu dəmləmənin içində oturduqda düyünləri kiçildir.

Kələmin qabığı ilə resept

Kələmin ən vitaminli yeri atılan qabıqlarıdır. Kələmi soyduqca vitamini azalır.

Limonun qabığı ilə resept

Limonlu çay içəndə limonun qabığını soyub, qurudub saxlayın, limon qabığı köpmələrdə və həzmsizlikdə çay kimi dəmlənilib içilir. Limon qabıqları həm də qurdqovucudur.

Portağal qabığı ilə resept

Portağal qabıqlarını qurudub saxlayın. Qurudulmuş qabıqdan 100 qram götürüb 0,5 kq bal ilə qarışdırıb məcun hazırlayın. Məcundan gündə 3 dəfə yeməkdən əvvəl 1 çay qaşığı yeyin. Bu əla qurdqovucu vasitədir.

Fizuli Hüseynov

Herba Medical Tibb Mərkəzinin baş həkimi, Həkim-fitoterapevt Dr. Fizuli Hüseynov.

Herba Medical Tibb Mərkəzinin baş həkimi, Həkim-fitoterapevt Dr. Fizuli Hüseynov.